سون طالع، سون قسمت تٲے تٲے
شینہ بالن منز یہِ جنت تٲے تٲے
سون تش خص خص اگر چِھس تی ونان
پھیرنہ زٔٹ، کانگر، کہالت، تٲے تٲے
یور چھا پٲرم سیاست کانہہ چلان
یتھ دپاں جے کے ریاست تٲے تٲے
کُن شکس لد رازہ ما اسہِ شوٗبہِ ہے
اسۍ ہتن رازن چھہِ رعیت تٲے تٲے
رنگہ دُچہِ کھیۆو یکہ یمۍ کھیۆو پادشاہ
سانۍ جمہوری روایت تٲے تٲے
دۆپ امامن چھس بہ یمہِ دورُک ولی
مقتدی ین پھُٹ طہارت تٲے تٲے
باکھ ژٔھٹ یارو زِ "یوسوفو وۅلو”
اوبرو ہے ہے تہ یزت تٲے تٲے
________
اسہِ تہِ کۆر اۆنگوٹھہ الحاقس تہ لو
اسہِ تہِ ؤژھ آکاشہِ برکت تٲے تٲے
کھوٗل اسہِ الحاق، نا الحاق وان
اتھ دکانس کرتہ برکت تٲے تٲے
سانۍ لکھ تکیَن اندر گیٖراں مدکۍ
سانۍ کتھ باوتھ نہ باوتھ تٲے تٲے
پیۆو ہُہ کرسی پیٹھہ تہ سانی دادِ لو
کھۆت یہِ کرسی سانہِ باپت تٲے تٲے
لیڈرو اۆن لیکچرن ہُند زور تیوٗت
پھٔٹ لُکن نس سیر تامت تٲے تٲے
کانہہ زۅگالا، یور کُن بدِ پھیرہن
ہول ہالا، جونٹہ باپت تٲے تٲے
رنگہ ڈیڈین زنگہ لوساں گتھ کٔرتھ
دۅلتہِ دیو پییہِ ناو دولت تٲے تٲے
کھسۍ کۅکَر تھزرن کٔھستھ ماراں گِلن
وسۍ پیواں اتہِ قابلیت تٲے تٲے
شاندہ تلہ نیراں چھہِ کینژن مۅہرہ ڈھیر
فضل ربّی ہچ کرامت تٲے تٲے
ہتھ گگر کھیتھ بیٲر گٔے پینشن تہ لو
وۅنۍ بنیہ صاحب طریقت تٲے تٲے
_________
دۆد یہِ محکمہ، دٔز ہُہ فیکٹری، گۆل رکارڈ
فیصلیو دۆپ ٲس شہمت تٲے تٲے
سانۍ دٲنشور کراں حاتم بٔنتھ
اگرہ مگرن ہنز سخاوت تٲے تٲے
سانۍ ٹی وی کیندرن پتھ دیُت علم
انۍ یمو جہلس سۅ جدّت تٲے تٲے
کینہہ تہِ گژھۍ تن، دِن بیانن پیٹھ بیان
لٔب میہ چھیس صٲبو تہِ شہرت تٲے تٲے
پریتھ نٔبِر جوٗ یوٗرپک باسیۆو نبی
نافہ زٲنتھ مٔج عفونت تٲے تٲے
مارکسۍ بے چارہ یٔڈ انۍ متۍ بسیر
سارتٔرۍ بیمارِ ہلپت تٲے تٲے
نانہِ ہاواں شرادھ پرگتی شیل چھیم
ژٔج نہ ژوٗرس ژوٗرہ خصلت تٲے تٲے
سانۍ ابہامن عجب اۆبروو نب
تاپہ رۆستے دٲخلیت تٲے تٲے
فاعلن فَعِلن وُچھتھ شاعر ڈلان
شاعرن فَعِلات ہٲبت تٲے تٲے
ون سہن ننہِ راگہِ خر کھٲلکھ اٹس
دم دنچ روزکھ نہ سکت تٲے تٲے
لٔٹ گہے گلنٲو، گاہے ہاوۍ ہینگ
با جمع بے سون غیرت تٲے تٲے
باگہِ کیُتھ تہذیب یتھ ریشوارِ آو
پیۆو زنگو منزہ سترِ عورت تٲے تٲے
سون گۆو آفاق تا آفاق لول
اسہِ چھُہ کیژن ہند محبت تٲے تٲے
ہم کو کیا مانیگا تم کو لاٹھ صٲب
اسہِ کھساں اردو شرارت تٲے تٲے
________
زینہ نُے گۆژھ توتہِ پاکستان میچ
ہارنُے گۆژھ توتہِ بھارت تٲے تٲے
ووٹ تراونہِ گوس دۆپہم با ادب
کٔر تہنز اسہِ پانہ خدمت تٲے تٲے
حاکمو منصوبہ دگۍ، بُزہیک کباب
پین دی دی لوٗس غربت تٲے تٲے
یورپن دۆپ زوٗنہِ رۆستے شرز بنو
زونہِ رۆس شرز داغِ حسرت تٲے تٲے
انۍ گواہ، پھتہ پھیارۍ دعوا، کلۍ وکیل
یِژھ شہادت تژھ عدالت تٲے تٲے
تٲے ناما وۆن عجب کامل جُون
تس تہِ تٔج باونۍ ظرافت تٲے تٲے
(یم میانۍ سخن، 2011)
یہ ںظم چھپیہ جولائی 1985 واد رسالہ کِس گۅڈنکس شمارس منز، یتھ منز ایڈیٹرو امکۍ 9 شعر شایع ٲسۍ نہ کرمتۍ۔
امین کامل -- اکھ مکمل ادیب 