تابانہ چھہ افتابہ مگر ہے قسمت!
مۅغلن چھیہ پننۍ ژھانپھ بہتھ دۅن چشمن

گژھ میانۍ کشیری ژیہ دۅہے آیرۍ بل
مہدیو نظر، ناگہ وُزنۍ ژۅن طرفن

شبنم تہ شہل تاپھ ژیہ سبزس سبزس
ونوُن تہ پھُلے پھال ژیہ گلشن گلشن

سنگرن ژیہ دۅہے ماگ گنڈِن پرینۍ ململ
مرگن ژیہ دۅہے زیٹھ سُوِن نۆو وَردن

مدماتۍ فضا، سۅرگہ ہوا دار، ہوا
ویتھہِ چانہِ نمسکار کٔرِن گنگا یَن

وِجہِ واو، شہج شامہ طراوتھ وۅلرس
تھتھراے ڈلس، کٲر وۅگنۍ پمپوشن

جانانہ پہلێ، نیرێ نَین، رمبلۍ نَے
مستانہ اۆبر، سالۍ وُڈِنۍ، پھم مالن

دبراے، تھدن پاے تہ ژندرم طالع
سیماب تنن، ہرنہ اچھن، لالہ رۅخن

کتھ چانۍ چھیہ اندرازنہِ دربارچ کتھ
ظۅن چون چھہ شہلتھ تہ شفایتھ مرضن

ازلے ژیہ کۆرُے مٲنزِ اتھو یمۍ شابش
تس ٲس خبر آسہِ یہِ کمۍ سند مسکن

شابش چھہ مییہ وُدۍ بوسہ کٔرم کاشر زیو
شابش چھہ میہ گیۆو، زوٗل کۆرم اگنہ گگن

کتھہ پاٹھۍ نہ پزۍ پاٹھۍ بہ چھس کُن یوسف
رح میون بنارس تہ حرم میون بدن

اکھ جلوہ اگر ہاوہ متن ہتھ معشوق
کم اوش پننۍ بوٗل گژھن نوش لبن

ژھۅپہِ میانہِ ورفتار خیالو دیت تھکھ
کتھہِ میانہِ زباں آیہِ، کجر ژۆل قلمن

بلۍ اچھرہ گیندُن میون چھہ طرحن پھرۍ پھہہ
ژھۆر میلہِ قلم میون چھُہ معنے ورقن

گرمیوس تہ ژلۍ مصلحتن نیٖرتھ چِل
نرمیوس تہ لگۍ ڈیر وتن پیٹھ سخنن

ژھۅکہِ میانۍ فکر، روٗسۍ کچن ڈلہِ رفتار
تھکہِ میانۍ نظر، زوٗن اچھن لگہِ زوٗنن

چھُس کنگہ دزاں پانہ تہ پاواں شہلتھ
چھُس واوہ ہراں پانہ براں گل ہلمن

یا یِکھ تہ وُچھکھ میانہِ کلامک وَن چھپھ
یا یِکھ تہ ژھنڈکھ میانہِ خیالکۍ دٔد وَن

غم میون چھہ گل خندہ بشارتھ پگہچ
کُس زانہِ بہ کۅس زان کراں چھُس حرفن

_____

افسوس زِ ژھۅژہ کانۍ بنے یِم سرہنگ
شکرانہ میہ کَن دھیان کمے تھۆو ہَوسن

وق ووت سہ نزدیک زِ لارن پتھرس
کُلۍ لنجہِ اکس لارۍ چھِہ کژتاں پہۍ پن

پریتھ کانسہِ چھہ وشنیر دلس میون اَسُن
اوحال کمس باوہ تہ کُس ہندراون

نٹۍ نغمہ تہ کٹۍ ڈالہ چھہ تہذیبک رنگ
فن ہاوہ تہ کیا ہاوہ یِتھِس وقتس، ون؟

خۅد دار ضمیرن چھہ حکم کرتلہِ شرم
اعلان چھہ شیطان وُچھتھ پیۆن سجدن

لاحول ولا قوۃ الا باللہ
کیا ناو چھُنا میون ژیتس نمرودن؟

بی گوم جگر پارہ، وَچھَس گٔنڈنم ریہہ
بی آے غمن کونچھ، طرح لۆب غزلن

_______

بی دگ میہ ؤژھم، واد میہ کۆرنم زخمن
افسوس یہِ کیُتھ کار میہ کۆرنم دَوہن

یم ساتھ، شترۍ ذاتھ، ژیہ ما وٲنجہِ کیُل
تم رٲژ، کرامٲژ، ژیہ ما وَچھ کوٗرَن

وۅشہ میانہِ اما گراے تہِ لٔج نا ہوہس
پۆت رٲژ ژیہ لۆت ٹھس تہِ گۆوے نا دٔرچن

سمسار چھہ بس چانہِ خیالک پرتو
چھُس یاد کراں چانۍ تہ دنیا سونچن

ہتھ مار چھِہ درپردہ گژھاں سحرس تاں
لچھ رٲژ گلن وال گنزرنس زلفن

پۆت زوٗنہِ تہِ یۆد بدلہِ ہوا باغس کُن
گل جامہ کرن چاک تہ بلبل چھِورَن

زہراب تہ امریت چھِہ اکی چیزکۍ وِہۍ
اتھہ پننہِ پِلو پیالہ میہ کُن، سونچ مہ، اَن

گل ورگہ اگر آو تہ کانہہ کانہہ خۅش بخ
کم جان تہ جانانہ چھِہ میژِ تل سۅسرن

بترٲژ عمل میانۍ چھیہ گٲمژ کامل
پھیراں چھیہ صبح شام چھما کُن واتن

________

بی پھیوٗر تسند کوچہ ژھنڈتھ واپس دل
بی پیوس ژیتس خانہ پنن، تُمدرِ تن

کُس خانہ دلارام تہ دل بند نگار
کُس خانہ زِ وُچھۍ وُچھۍ تہِ چھیہ اچھ بی کریشن

سُے خانہ زِ یتھ پیدہ میہ ہیوٗ گۆو کامل
لل موج تہ نندہ ریۆش چھِہ یمس لۅلہِ للون

چھُس نار تہ نارس چھیہ نہ پوراں کانہہ ریہہ
چھُس آب تہ آبس چھہ نہ دامن أدرن

یۆت تام چھہ بترٲژ تہ افتابس سنگ
شاداب یہِ ریشۍ وٲر تہ یم میانۍ سخن

(یم میانۍ سخن، 2011)

یہ ںظم چھپیہ نیب رسالہ کِس اکتوبر1970 شمارس منز۔ یہ نظم تہ اتھ سیتۍ باقی نظمہ آسہ نہ "پدس پۆد ژھاے” سۅمبرنہِ منز شامل کرنہ آمژہ۔