گیلری سوال چھہ کلک

تمۍ وۆنم ہنا ژکھہِ سان ہیو۔ "ژیہ ترنے نہ یمہ کتھہ فکرِ۔ یم چھہِ قانونی نکتہ۔ یہ بڑا نازک مسئلہ ہے۔ یہ چھہ نہ وۅتھہِ دیدی تہ شیرِ بتہ۔”

امۍ تج میزہ پیٹھہ سگریٹ ڈبۍ۔ میہ لج ژھۅپہ۔

امۍ زول سگریٹ۔ پان پتھ کن ترٲوتھ پھکرووُن تالوس کن اکھ گۆن دہۍ لۅمبکھ، یُس ہنہِ ہنہِ تنیوو، پھہلیوو تہ سارۍسے کمرس آو چھکرنہ۔ تہ ٲخرس پننہِ وجودچ بد بۅے پتھ کن ترٲوتھ میول واوس سیتۍ واو۔

میہ ٲس ژھۅپہ لجمژ، اما پۆز سونچان اوسس کینہہ منوش کیازِ چھہِ ٲسہ کنۍ  دُہ پھکرۍ پھکرۍ اندۍ پکھس بد مشک بناوان۔ پانہ خبر کیا کیا سۅکھ بوگان، مگر بیین پھرکھ تہ تم پشرٲوتھ لسُن بسن مشکل بناوان۔ بہ اوسس یمنے غۅطن زِ ماۍ وۆن بییہ: "بوز ، کتھ چھیہ نہ جسمچ۔ یہ دھڑ کی بات نہیں۔ یہ چھہ کلک معالہ۔ میہ کیا چھم تسندس مسلس تہ مازس کرُن۔میہ چھہ مسئلہ زِ لاشے کلہ اوس تہ کور کن اوس۔” تمۍ  وۆن زور دِتھ۔ "یہ اصل مسئلہ ہے۔”

میہ کٔر فکرا زِ لیہ تہِ کیا انسان کلہ تہ کاڈِ رۆس۔ یُس سر سر سہ چھہ اتھۍ کلہ کھاسرِ۔ میہ پھٹرٲو پننۍ ژھۅپہ تہ پان سۅمبرٲوتھ پرژھمس بلۍ۔”اہن حض تۅہہِ چھیہ نا خبر اوسس کور کُن کلہ؟”

"ہم کو سب معلوم ہے۔” تمۍ وۆن دند چیرتھ ہیو۔ "تمن چھیہ خبر اسۍ کرو گڑبڑ گٹالا تہ نمو پنن باز زینتھ۔ مگر ہم نے کچی گولیاں نہیں کھائی ہیں۔ بہ گوس تتھ کیت پرون ماکن۔ بہ چھس نہ راتھ دراس کالجہ تہ از بنیوس اوریور ہارہ وارہ پلنٲوتھ تھاندار۔ تہِ گیم وۅنۍ ترہ ؤری پلسہ بتہ کھیوان۔ میہ نِشہ نہ وۅٹہ۔”

یہ کتھ بیٹھ میہ۔ انسان ہیکہِ نہ اکس ماکنس نِشہ وۅٹھ کڈتھ، ادہ یُس دۅن ماکنن منز ہینہ ییہِ، تمس چھیہ پانس لۅتہِ پاٹھۍ کریا کرمچ تہ لحذ ہنز صورت تھاونۍ کٔرتھ۔ ماکن گۆو ماکن۔ یتھ انگس چپرتھ گۆو تتھ وۅتھہِ نہ تھۆد کوتاہ تہِ تچھۍ توس۔ تی گۆو اتھ لاشِہ یۅسہ دۅن ماکنن اندر ہینہ ٲس آمژ۔

میہ ٲس پیٹھۍ پیٹھی کتھا کنن گٲمژ، اماپوز خبرا ٲسم نہ کینہہ تہِ۔ اوہ کنۍ اوسس محض پننہِ زانۍ خاطرہ قصک ژۆک زانن یژھان۔ نتہ بہ کانہہ فیصلۍ اوسس نہ زِ نیاے بوزتھ دمہا تتھ ژھین۔ توپتہ یود تہِ تہِ خیال آسہم دۅن ماکنن منز پیتھ کھیمہ ہا بے لپر۔ جنن ہیکہِ کانہہ کۅجنے پیٹھ بہت۔ کتھہِ واوُر دیاوناونہ خاطرہ پرژھس میہ بییہ۔ "تۅہہِ آسہِ پتہ پہن خبر لجمژ، نتہ کتہِ تلہِ ہے خام پوریک تھاندار تۅہہِ نِشہ وۅٹھ۔”

میہ باسیوو امس گۆو پھر۔ تکیازِ گردن گیس ہنا ہج، وٹھن پھۆلس اسُن تہ اچھن پھیرس شیطانۍ چمک ہِش مگر اتھۍ سیتی آیس بمہ چارنہ۔”یہ چھیہ سٲرے امس عمہ کنسٹپلہ سنز غلطی۔ خبر زانہ ہنہ؟” امۍ پرژھم۔

"اہن حض کیازِ نہ۔” میہ وۆنس زاننہ کرنہ رۆستے۔

"امۍ احمقن رکوو نہ سہ نفر۔” یہ لۆگ وننہِ۔”میہ کٔرن نہ اندر کن خبر۔ نتہ لگہِ ہے میہ دودھ کا دودھ اور پانی کا پانی سٲرے خبر۔ توتہِ نیہِ میہ پننۍ کاغذ درست کٔرتھ۔”

"اہن حض سہ اوس کُس نفر؟” میہ پرژھس کتھہِ ہنا واش کڈناونہ کہ غرضہ۔

"تہِ چھم نہ خبر۔ عمہ کنسٹپلن کلہ۔”امس کھۆت جکھ ہیو۔ "گۅڈہ چھکھ نہ بیچھتھ تہِ بنان تہ گژھان چھم سپاہ برتی۔ یمن چھا کاڈۍ۔یہ معاملے کی نزاکت نہیں سمجھتے ہیں۔ سہ گژھتھ چھم ونان یہ حض اوس کستام گرۍ سوار۔دپان پوشہ مرگہِ بونہِ تل چھیہ لاش پیمژ۔دتس جواب۔ ہیو خرا، تم نے اس آدمی کو چھوڑا کیسے؟سہ اوس کُس، کتیک؟ تمی زن آسہِ ہے قتل کۆرمت۔کیوں؟ ہوسکتا ہے۔ تھانہ دارس چھہ آسان دہن کتھن سنن۔ کنہ نہ؟”

"توت تام حض چھہ پوزے۔بییہ تہِ کٔرتھ تۅہہ ہیو اگرہ نگر مشہور تھانہ دار۔ وۅنۍ کیا اتھ چھا کانہہ ٹھونٹھ یوان؟”

"ٹھونٹھ؟” تمۍ مژراوِ راتہ مۅغل چالہِ اچھ، کھوورِ اتھہ تھٲون پلسہ ٹوپۍ پتھر تہ کٲر تُلتھ وۆننم۔ "ٹھونٹھ شونٹھ کوئی نہیں ہے۔ اسہِ چھیہ یژھہ واریاہ کھیلہ گنزمژہ۔ سانۍ کاغذ چھہِ نہ کچ۔خام پورچ تھانہ دٲرل ژانس اورۍ۔کاغذ بول اٹھیں گے۔” یہ ؤنتھ ترووُن ٹھہہ ٹھہہ اسناہ۔ میہ تہِ آیوو، سیتی سوچم، پانا یہ کتھ تام پیٹھ وسان، ژیہ زن کیا گوے۔امۍ تل میزہ پیٹھہ چہ رکابہِ منزہ کھنڈہ پھۆلا ہیو کیہہ تام تہ ترووُن ٲسس۔ سیتی کٔرن میہ تہِ مازرتھ۔ "کھیہ سا۔یہ چھے بڈہ مزہ دار چیزا۔”

میہ تہِ تل پھۆلا تہ ترووُم ٲسس۔ پزۍ کنۍ لۆگم بڈہ میوٹھ۔ میہ سونچ یہ تہ میٹھیوو، دس ترک۔

"اہن حض تہ خام پوریک تھاندار تہِ ما بیہہ کھۅڈ پھینچہ رۆس۔ تمۍ تہِ آسہِ کینہہ نتہ کینہہ سوچتھ تھوومت۔”

"سوچنے دو جی۔ کاڈۍ پینس پانس وسۍ۔تمس کر چھہ سوچن تۆگمت زِ از تگیس۔” امۍ کۆڈ نرِ تلتھ واش ہیو تہ ٹوپۍ دژن کلس۔امہ پتہ وۆنن زامن ہش کران۔ "تمس یۅسہ شیطانی کرنۍ ٲس سۅ کٔرن۔ اتہِ اور کیا کرِ۔ہم ہر طرح چوکس ہیں۔”

"شیطانی کیا ہش ٲسن کرمژ؟” میہ پرژھس چارۍ آیہ۔

"آ۔ بے ونے۔” تمۍ گلنوو کلہ اول وانگن نۆن کڈنہ کہ آیہ۔ "یتھے میہ بوز زِ پوشہ مرگہِ بونہِ تل چھیہ لاش پیمژ، میہ تل یکدم پنن عملہ فعلہ تہ دوریوس۔او ٚت تام لۆگُے وقت۔سون تھانہ ما چھہ خام پورچ واتل پہر۔ یتھ چھہ بۆڈ جیورس ڈکشن۔یتھے اسۍ اور واتۍ، سہ وچھم کژتام اۆک کانیل کنسٹپل ہیتھ وٲتتھ پیومت۔لاش بونہِ تل پڑاہ۔ مگر میں سب بدمعاشی سمجھ گیا۔ اسیا تارنۍ۔ مسس تیا کپس۔” امۍ تل بیاکھ کھنڈہ پھۆلا تہ وولنس کنے بریکھ۔

بہ اوسس زانن یژھان زِ اکس لاشہِ کتھ اوس دۅن تھاندارن دورُن۔ یمۍ سندس بنس منز لاش ٲس سہ زانہِ ہے تہ کار زانہِ ہے۔ اوے پرژھمس حیرانی سان۔ "اہن حض تہ لاش کہندس جیورس ڈکشنس منز ٲس؟”

"لاش ٲس نہ کٲنسہِ ہندس تہِ جیورس ڈکشنس منز۔ لاش دو تھانوں کے درمیان ڈمارکیشن لاین پر تھی۔ اسہِ اوس لازما گژھن۔ تمن تہِ اوس واتن۔ بہ کتہِ ونہ تم کیازِ ٲسۍ نہ آمتۍ۔ ہم کوئی غلط بات نہیں کہیں گے۔” امۍ ترٲو کٲر تُلتھ دارِ نیبر کن نظر۔ اتہِ ٲسۍ پلسہ والۍ جوراہ سڑکہِ پیٹھ کس تام ٹاپہ وان۔ میہ تہِ ٲس اور سیود نظر۔

"اہن حض توتہِ کیا گۆو۔” میہ پرژھس سیزرہ پٲٹھی۔ "اکھا کرۍ زِ ہو تفتیش۔”

"تہِ کیا گۆو اکھا؟” تمۍ کۆرم ہزل۔ "تفتیشک حق چھہ صرف تمس آسان یمۍ سندس جیورس ڈکشنس کن لاشہِ رجوع آسہِ۔”

"اہن حض تہ سۅ ٲس تہندی وننہ ڈمارکیشن لاینہِ پیٹھ۔” میہ وۆنس۔

"وہ تو ٹھیک ہے، مگر لاشہِ کور کن اوس کلہ۔ یہ چھہ انزراوُن۔” امۍ وۆن۔

بہ رووُس۔ کینہہ پیوم نہ پلہِ۔ امۍ کریایہ برونہہ تہِ کلچ کتھ ، مگر تمہِ وزِ نیہِ میہ سۅسرسری پٲٹھۍ۔ میہ پرژھس۔ "اہن حض تہ کلس کیا چھہ اتھ معاملس سیتۍ تعلق؟”

"تعلق ہے، ضرور ہے۔” تمۍ وۆن زور دِتھ۔ "میۍ برونٹھے وۆنے ژیہ ترنے نہ یمہ کتھہ فکرِ۔ یہ چھہ قونونی نکتہ۔ ہرگاہ دۅن تھانن ہنز ڈمارکیشن لاینہِ پیٹھ کانہہ لاش آسہِ، تتھ ہیکہِ صرف سے تھانہ قبضس منز أنتھ یمۍ سندس جیورس ڈکشنس کن لاشہِ کلہ آسہِ۔”

بہ گوس ہے بنگہ تہ کریمانہ کڈانے پرژھمس۔ "اہن حض تہ اتھ لاشہِ کور کن اوس کلہ؟”

"یہی بدمعاشی ہے۔” تمۍ وۆن کلہ تہ پان ألراوان۔ "یہ خام پوریک لاشہِ واتل اوسے برونٹھے پوشہِ مرگہِ اندر وٲتتھ پیومت۔ شیطان کا پرکالہ۔ میں سب چالاکی سمجھتا ہوں۔ امۍ اوسے لاشہِ پننس جیورس ڈکشنس کن کلہ پھرنوومت۔ لاشہِ انہِ ہے پننس قبضس منز۔ اسۍ گیہ پرانۍ کھلاڑۍ۔ اما بہ دمہ ہسہ تتھ اتھ وتھ۔”

میہ اوس وۅنۍ سورے معاملہ عیاں سپدمت، اماپۆز اکھ کتھ ٲس روزان۔ توے پرژھمس۔ "تۅہہ کیا  ہیو کۆروہ؟”

"بہ دمہ ہسہ لاش قبضس منز اننہ۔ تمن پھتۍ فقیر کنسٹپلن کرنٲوس پننین سپہن اتھہِ خوب لٲٹھۍ۔ وۆتھ نیاے تہ وۆتھ۔ کاغذ خود بولیں گے۔ پیومت چھہ اورۍ معاملہ۔”

میہ سونچ ہرگاہ اتھ لاشہِ پرکژ اژِ، چھنا بنان، بہ وتھہ تہ نیرہ پنن گرہ کن۔مگر سیتی پیوم ظۅن تہ وۆنمس۔ "مگر اتھ لاشہِ ۔۔۔وچھ حض سۅ سڑِ۔ ٲخر کوت کال۔۔۔”

تمۍ دژ نہ میہ پورہ کتھ تہِ کرنہ۔ "سڑنے دو جی۔ سوال چھہ کلک۔ سہ کور کن اوسس۔ یوت تام نہ سہ نیاے اندِ، اورۍ چھہ معاملہ اویزان۔”

میہ گیہ ژھۅپہ، ونہا تہِ کیا؟

جواب دیں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google+ photo

آپ اپنے Google+ اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s