گیلری نظمیات

سازندر

سے گۆو سازندر یُس سازس
اندرم شیچھ ونہِ نتہ گۆو کۆٹ
دلہ چیٚن تارن یُس رود چارن
لولاہ سۆر یمۍ نارا ژھۆٹ
یمۍ سند گیوُنا دیپک راگا
ژکھ لگہِ ژانگین ژلہِ انہِ گۆٹ
ہردہ کہ زرہ نشہِ تھوِ یُس رچھۍ رچھۍ
دمہ دمہ پننے پھۅلوُن ہۆٹ

(مس ملر 1955)

فن کس تصورس پیٹھ چھیہ یہ کاشرس منز شاید گۅڈنچ نظم۔ یہ چھیہ سن 1953 منز لیکھنہ آمژ۔


روت موکل

کۅ کتھ ہیتھ آو شبنم راتھ شامس
قدم سۆتۍ پاٹھۍ تروون پوشہ وارے
اژتھ پوشن کنن منز راتۍ راتس
اپز اۆش رود ہاراں تولہ وارے
مٹنۍ گورا ملا زن خانقیشا
ونان اوسکھ چھہ دنیا دار فانی
فریبا بۆڈ یتیک اسنا تہ عیشا
رِوانی یۆت اژن نیرن رِوانی
اتھۍ اندر آفتابن تروو پرتو
اچھن گاشا اۆنن کوسن دلن مل
عناصرہ شبنمس ڈجہ تے کٔڈن دو
فنا گۆو گاش ڈیشتھ روت موکل
ژھُنس کھنگالہ پوشو مس ملوریو
کۆرس ژرِ پۆپ شریو زن پوشہ ٹوریو

(مس ملر 1955)

سانیٹ فارمہِ منز چھیہ یہ امین کامل سنز اکھ ابتدایی نظم یۅس 1953 ہس آس پاس وننہ آمژ چھیہ.
پرو یتھ نظمہ پیٹھہ منیب الرحمن سند تبصرہ


چانۍ عشقن ۔۔۔

مہرباں بنۍ بنۍ میہ زخمن رودۍ تراواں کیتۍ نون
بے قراری ہند گژھن لاحد، دلس سپدن سکون
شام کس شفقس اندر پرزلاں چھیہ یتھہ کنۍ کاژہ زون
کاتہن خوابن تہ ارمانن میہ گژھۍ گژھۍ دۅہلہِ خون
چھم یتھے کنۍ توتہِ سینس منز میہ زوتاں چانۍ آش

چانۍ عشقن میون دل پرزلوو، بدلٲون نظر
حسنہ زونا عشقہ سدرس منز تلاں آبچ لہر
شبنمک ٹوٹھن چھہ کیا؟ صدفس گژھن حاصل گہر
ڈل طوفانس منز یتھنۍ پمپوش روزاں بے اثر
حادثاتن منز تتھے کنۍ میون دل ثابت قدم

خون جگرچ مانز لاگاں چھس بہ ارمانن نمن
ٲنہ پگہچہ شادمانی ہند رٹتھ ازۍ کین غمن
پیدہ کٔرنم پیچ وتابی چانۍ اکۍ زلفِ خمن
سونتہ کالک واو یتھہ کنۍ نندرِ وزناواں چمن
چون یُن کر ہے تتھے کنۍ میون مفلس بخ بیدار

بے خبر کیا زانہِ کیا گۆو لول، کیا عشقچ حیات
مقصدا رُت برونٹھ کن تھاوُن تہ ژھارُن دوہ تہ رات
نارِ نمرودے خلیلن کیت چھہ بٔڈ سونتچ برات
عاشقن ہنزِ مایہ پیٹھ قایم چھیہ سٲرے کاینات
مرحبا یم لٲلہِ وقتہ چہ شوقہ از نرِ آلون

(مس ملر 1955)


چون یاوُن

چون یاوُن میانہ لوکچارک سہ خواب
ہیکہِ نہ یۆت وٲتتھ خیالک زاوۍ جار

کارتکچ زون سونتچ پوشہ تیٕر
پتھ ونس منز مس ملر اکھ آبشار
شیلہِ پیٹھ آرس اندر گِلہِ ہند سرود
ویرِ شہجارس گگوسک گورہ گار
وِر کننہِ ہنز تازہ ٲوج لولہ تن
زندگی ہنز چاش ہیتھ اژہ وُن بہار
ہیکہِ نہ یتھ بٲوتھ خیالک زاوجار
چون یاوُن میانہ لوکچارک سہ خواب

یُس بیاں کرنس چھہ لفظن اضطراب
چون یاوُن میون سے رنبہ وُن امار
شراونک یاوُن تہ ہارک آفتاب
پۆت شبچ اکھ شولہ ونۍ کریکھ نار نار
بالہ دریاوا گریزاں دوراں دواں
ژھالہ ماراں اگرہ نگرن بے قرار
پیالہ منزہ ژلہ وُن شرابا خوش پسند
جوشہ وُن شفقا تہ پۆت دگرک خمار
آفتابک زونہ ہند رُت ساز وار
چون یاوُن میون اکھ رنبہ وُن امار

(مس ملر 1955)


زندگی تہ موت

اکھ بالہ کۅلا ژھالہ نِواں ٲس میہ وۆنمس
پرژھہے بہ کتھا بوزتم آسی ژیہ خبر یۆد
موتک تہ حیاتک ژیہ ما از تام لۆبتھ پے
ؤژھ آبہ لہر اکھ زِ دریاوچ بہ چھیہ سے زیو
رُکنچ میہ محل چھم نہ، سفر زیوٹھ کرُن چھم

دامانہ رۆٹم سونتہ کس بے تاب ہواوس
جانانہ لگے پارۍ قدم تھاو کتھا بوز
خبرا میہ ونکھنا ژہ کانہہ مرگچ تہ حیاتچ
درسہ دِتھ سہ وۆتھم لونچہ مہ لم، دور اُکن روز
وق چھے نہ میہ بترٲژ ہلم پوشہ برُن چھم

کمہِ آشہ وۆنم پونپرس دیوانہ کتھا بوز
ناوس بہ لگے کرتہ ژٲنگس کم ژہ اکوے گتھ
موتچ تہ حیاتچ میہ کانہہ دِتہ تازہ بشارت
ژھٹھ دِتھ تہ زٲلتھ پان کٔرن اورہ یژے کتھ
نارس اندر تھہہ پان لٲیتھ یار سرُن چھم

اکھ تارکا میزانہ نش ڈۆل یام میہ وۆنمس
ہا رِکنہِ گندن والہِ رماہ پان ژہ ٹھہراو
موتک تہ حیاتک ژیہ ما از تام سۆرتھ راز
ترٲوتھ وۅشا لوین صدا وۅنۍ میانۍ کتھا تراو
موتچ میہ چھے ژلہ لار ونے کیا میہ مرُن چھم

(مس ملر 1955)


یارہ بلک سحر

سحر سپد تہ دعا ماجہ وے یہ لوگ کرُن
"الہی کل جہانس یژھم میہ لول برُن
منگُن قبول ژہ تھاوم تگیم نہ حال ونُن
نبی وسیلہ میہ اۆنمے لگس قبیلہ پنن
پۅہس ژہ ہار کٔرتھ پوش برتہ دامانس
الہی سایہ ژہ کر پریتھ ہیندس مسلمانس
پتھر مہ کانہہ تہِ ژہ پاوُن غریب کانہہ مہ کرُن
غمن اندر مہ ژھنُن بد نصیب کانہہ مہ کرُن
بتک سۅ کال ژہ تھو کارہ بار عام ژہ کر
دفع بلایہ خدایا لڑایہ، لام ژہ کر”
دعا یہ ماجہ نے ہند کوت پرخلوص چھہ وچھ
یہے چھیہ سانۍ بٔڈ انسان دوستی ہنز مثال
بہ کنہ نہ زانہہ تہِ یہ ماجن ہندے دعا تہ یہ سوز
بہ چھس نہ تیوت سیہ دل کپوت، بد اعمال

(مس ملر 1955)


زہ رۅخ

ونتہ ویسۍ لگہار کتھ رودس بہ گژھہ کتھ بازرس
واوہ ہردنہِ رم گیم شیشس بیگُر گۆو بانہ میون

اہل دل شرپۍ اند مزارن دوست دارن داغ دِتھ
حسرتا در دل میہ للوُن بوزِ کُس افسانہ میون

کاوہ نِکھنا گراوہ میانے بے وفا بے عارسے
وچھتہ غیرن پتھ گۆمت کوتاہ چھہ مۆت جانانہ میون

کالہ مویس ژام زر کتھ یاونس کیا گوم سور
حسرتا سرۍ سرۍ تہ وچھۍ وچھۍ دل سپد بریانہ میون

ضایع یاوُن لہو و لعبن پتھ میہ گۆو وۅنۍ یاد پیوم
اے دریغا کریوٹھ منزل بے حصر سامانہ میون

__

شالمارن لالہ پھولۍ سونتکۍ گبر وتھۍ ساز ہیتھ
پوشہ ونۍ سازن سرودن جوشہ اۆن پیمانہ میون

کینہہ ؤتھر سۅمبراوۍ پوشو کینہہ ورق تلۍ بلبلو
تھوو کیا رچھۍ رچھۍ قدر دانو مۅلل افسانہ میون

میانہ ہمیژ ما ززر زانہہ ژاو ماگک داغ لۆگ
مشکلاتو کم پننۍ کنۍ کۆر نہ دل بریانہ میون

دل اگر زیوِ نش جدا گژھہِ روزِ دل باقی نہ زیو
میانہ نالہ کہ حالہ نش چھہ نہ بے خبر دامانہ میون

یا غزل مستانہ لولکۍ یا امارن ہند خمار
لولہ منزلن منز یمے آلو یۆہے سامانہ میون

(مس ملر 1955)


پراگاش

چھس بہ آمت زندگی ہنز چاش ہیتھ
ہولہ رٲژن شولہ ون پراگاش ہیتھ
تازہ وقتکۍ ساز تے سامانہ ہیتھ
غازہ رخسارن تہ زلفن شانہ ہیتھ
آفتابک سوز پیمانس بٔرتھ
تارکن ہنزہ چونہ دامانس جٔرتھ
کانہہ میہ ہیو بیاکھا تہِ چھا روشن نظر
چھس وناں مس ڈیشتھے نشہ چی خبر
سوسنیمتۍ باغ پھۆلرٲوم میہ کیٕتۍ
شاعری ہند ناو روشن میانہ سیتۍ

(مس ملر 1955)


آلیک پوشنول

ہا نندرِ متیو! نیر یہ منزُل تہ گگس تراو
مژراو اچھ کڈ واش پکھن ہاو کینہہ چکہ چاو
وۅتھ تازہ سفر پراو
نٔو زندگیاہ چھاو

رنگہ رنگہ ولان جامہ گلن رنگہ رۆس افتاب
وچھ ٲنہ جۅین منز چھہ نژاں آب زن سیماب
ژہ تہ لاگ کینہہ بیتاب
زیو چانۍ چھیہ مضراب

گیہ باے تہ بند چانۍ ہیتھ کرتام پنن ساز
انجام تہند؟ پوشہ چمن لولہ ہژ آواز
چھیہ نہ زندگی کانہہ راز
آغاز چھہ پرواز

پتھ زندگی زانہہ ہیۆت نہ وچھتھ شراکھ تہ اہریز
چھہ نہ رودمت ازتام عشق کانسہ ہند آویز
پھٹراو یہ پرہیز
کر نار دلک تیز

ونۍ چھی ژیہ دوان پوشہ چمن تھارِ وچھان پوش
تنہا ژہ بہت دور نہ غیرت تہ نہ کانہہ جوش
چھکھ یوت کیا مدہوش
سونتس ژہ ہنا توش

وۅتھ تراو یہ غم غصہ منزُل واے سوکھک ساز
مضراب دِ سازس تہ کُنی لولہ ہژ آواز
رٹھ یاونک انداز
پرواز کر پرواز

(مس ملر 1955)


موج بتراتھ

دلس میہ پیچ و تاب چھم
نژاں نژاں پکان چھس
یہ کس بہ ؤنۍ دوان چھس
چھہ سلسلا یہ اکھ عجب
بنیا یہ آسہِ بے سبب
چھہ برونٹھ پتھ کرُن ادب
میہ کعبہ آفتاب چھم

میہ پھانپھلٲو زندگی
پری یہ ٲس کھسونیا
سیٹھا حسیں تہ لسونیا
میہ تن دژم بلایہ نے
رچھم یہ پوژِ ژھایہ نے
وچھم امس میہ گرایہ نے
دلس میہ کیٕژ چھم خوشی

چھہ زیوٹھ اکھ یہ سلسلا
امس میہ سیۆن تہ کیۆن دتم
یہ آپرم ہہ کھیۆن دتم
یہ منزلن رواں سپز
گنداں گنداں جواں سپز
کتھا یہ داستاں سپز
زتنۍ بنییہ وزملا

(مس ملر 1955)


ژہ آیکھ، مگر

ژہ آیکھ وۅنۍ مگر ہلمس لٔدتھ پوش
کنڈیو رتہ دٲوۍ ییلہ کۆر میون یاون
جدایی ہندۍ میہ ہردن رنگ تاں ڈول
وۅں کرتن ماگہ بزۍ وصلک یہ شراون
ژہ یتھ پونپر بٔنتھ گتھ کرنہِ آیکھ
سہ ژونگے ژھیۆو یہ کیا چھے شولہ ناون
یمو وشنیو وٹھو شینس مہ کر میٹھۍ
یہ گۆو وشنیر پننے راوہ راون
میہ ددۍ متۍ گاسہ تلۍ تامت زمینس
اۆبر کھٲلتھ ژہ کیا ہیکھ آبہ ناون
یہ امریتہ کھوس کُنہِ سیکلس ڈیکس لاے
سۅ تریشی پھٹ سہ جوشک سور یاون
میہ کیا وۅنۍ تلمہ کرۍ تن کانہہ نقابس
میہ ہیۆتمت پان پننے ژورِ تھاون
میہ ہۆکھ وُڈرن اندر نژۍ نژۍ رگن خون
ژیہ یژھۍ نے ڈل ہواوس چیۆن تہ چاون
میہ زن گۆو ہیرِ کھسون پوو نیرتھ
ژیہ یژھۍ نے زندگی ہند بام چھاون

(لوہ تہ پروہ 1965)


زیرو برج

یہ چھہ زیرو برج
یمہ شہرہ تہ پریتھ ہنگامہ بدون
سنسان وڈر پیٹھ آسن د‏تھ
تن تنہا، نیتھہ نۆن بیرٲگیا

استادہ سۆتھِس پیٹھ ہم قد پھرس
صفحہ گنڈتھ عیذ نماز پران
لا یلف قریش الفہم

خاموش، سفید ہوس بوٹن
پۆت زون چھیہ جامن داغ چھلان
ویتھہِ ہندین پاں آرن اندر
نپہ ناو چھیہ پہمژ چاندۍ کران

یہ چھہ زیرو برج
زیرو چھہ عجایب نقطہ مہ پرژھ
اتہِ گرند راواں، اتہِ گرند وۅپراں
یمۍ وُزہ منزہ کۆڈ نہ قدم از تاں
تس کیا چھہ لطف تمہِ آولنیک
ستہِ پورہ وچھتھ بۅن یُس چھہ یوان

وچھ دورِ ہہ بالس پیٹھ مندر
انسان چھہ ہر وزِ دلدارس
تھزرس پیٹھ شیراں سنگاسن
جے شنکر چانہِ جٹایہ دۅہے
زُنہ شبنم تارکھ پرزلاوُن

یمہ فضہہ منزۍ چھہِ دپان اکھ وتھ
کتھ تام بیہ پے شہرس نیران
کُس ژلہِ ہستی ہندِ حاطہ نیبر
کنڈۍ تارِ تھدم تھزِ ژھال تُلتھ
کس زالہِ یہ سمسارک کل، یتھ
پریتھ لنجہ چھہ ژہۍ ژنۍ دۅد نیران

ہُتھ بونہِ ہمن پنہ وتھرن منز
اچھ پیٹھ چھیہ گمژ اچھ زونہ زژن
احساس چھہ تیزاں پۆت راتک
چرچیں چھیہ ؤٹل کانہہ یام کراں

تس یارِ مشن گارس ونۍ کین
کینہہ آسیا میون تہِ خواب یوان
ییتہ ہے چھہِ یِوُن سونتس اندر
میوہ رۆس وِرِ تامت گب نیران

خاموش فضا بے تار وزاں
پریتھ چیز سۅرس سیتۍ سۅر ملوان
دل میون تہِ کیاہ تاں گنگراوان

قدرژ تہِ چھیہ فنکاری ہنز خۅے
کم نقشہ چھیہ تراواں ژھایہ، ژہ وچھ
اسۍ کیا چھہِ فقط نفشن ہندۍ رنگ
پیۆو تاپھ تہ چھتۍ چھتۍ مد مۅکلیۆو

سہ تہِ واتہِ دۅہا ییلہ ژھایہ ژھیون
یم رنگہ رنگہ سٲری نقشہ مٹن
یکسان پرگاشک نقطہ بٔنتھ
سمسارہ چہ ویتھہِ ہنگامہ بدون
پریتھ انسان بنہِ اکھ زیرو برج

(لوہ تہ پروہ 1965)


نیتھہ ننۍ معنی

زلفن چانین ہند گۆن سایہ
یتھ صحراوس میانی مایہ
پچھۍ یا ریتۍ چھیم چٲنی یاد
دلہ کس دروازس دبرایہ
وٲنس پیٹھ کمۍ دوریر یۆژھ
تمہِ پژِ ما سمسارس زایہ

واون کۆر شمعہس بلۍ گیند
نبہ کین ژانگین ؤژھ تھتھرایہ
جگرن تھاویو دادین ٹھان
کرِ کیا دل چھس بر ہمسایہ
نفرژ حسرت وٹھ کمجار
لولس نیامت اشۍ ددرایہ

سونچکۍ پیمانے گیہ تنگ
بییہ ما سنا کینہہ قٲلب درایہ
ہتہ سا بہ تہِ کٕنہ لولک سریہہ
ہتہ سا بہ تہِ چھُس تہنزی ترایہ
کمۍ دۆپ ییتہ چھیہ نہ آدمۍ بۅے
یم کیا ادہ جھا ساریۍ ژھایہ
اچھرن ہند زربف نایاب
نیتھہ ننۍ معنی گٲمتۍ ضایع

ہونس گردنہِ سۅنہ سند کۆر
رتہ چھپہِ لگیو اتھ وۅپھرایہ

یتھ ہندرس شہرس منز میون
بڈکیل دل تہِ چھہ بۆڈ سرمایہ

(لوہ تہ پروہ 1965)

کامل چھہ یہ نظم فروری 1961 چہ کاشر بزمہِ ہنزِ میٹنگہ منز پران (گلریز رپورٹ) تہ امہِ رسالہ کس فروری 1961 شمارس منز چھیہ یہ چھپان۔ میٹنگہِ منز چھہِ اتھ نظمہِ متعلق اختر محی الدین ونان زِ "اسہِ سارنے اوس یہ خیال رٔٹتھ زِ برونٹھ کن چھا لیکھنچ کانہہ وتھا کنہ نہ۔ اسہِ یا اوس شعرن ابہام گژھان نتہ ٲسۍ رومانیتس کن دوران۔ یہ نظم چھیہ رمز پیش کٔرتھ اکھ صحت مند وتھ ہاوان۔” (شاید چھہ ابہام راہی یس تہ رومانیت فراقس کن اشارہ۔) راہی چھہ اتھ "نفیس نظم” ونان تہ مقبول (بقول مظفر عازم شاید مقبول حسین جرنلسٹ یس "مزدور” اخبار کڈان اوس) چھہ ونان زِ "یہ نظم چھیہ تمہِ اکہِ نوِ ترایہ ہند دسلابہ کران یتھ اشاریت ونان چھہِ۔


یہ سیہ برونز

نم یۆتامت چھہِ سلامت انگ زخمن چھہِ سراب
قد یۆتامت چھہِ قداوار قیامت چھیہ بلن

یہ سیہ برونز یہ گژھن والہِ زمانک یمہ ہیُک
یہ سیہ برونز یہ اژن والہِ زمانچ زینہ چخ
یہ سیہ برونز چھہ تِتھے کنڈین چھہ شولاں تقدیر
پدۍ چھہِ پژراواں گُلن قمرین چھیہ لاراں زنجیر
حسن؟ افلاس تصور تہ عشق؟ جرم کبیر
اتھۍ سیہ برنزس اندر پابند حرکت ژہ تہ بہ

یہ گل اندام ستی سر یہ پشاچن ہنز کشیر
بلبلُن اول یہ شو مالین حسیں ناگہ دِوے
لل مژ روزِ نہ یجبیارِ دۅہے ٹاکین تل
نندہ ریۆش زروِ نہ زانہہ سہزہ وژارس انُومل
مون اندۍ پۆک چھہ سیہ پوش تہ موسم اجہل
چھہ جنون یۆت تاں سلامت چھہِ سلامت ژہ تہ بہ

سانہِ زے ژھایہ بنن لولہ فسانک عنوان
بس دۅیو نارہ بریہو واتہِ یہ افسانے اند

(لوہ تہ پروہ 1965)


نیلہ ناگ

راتھ بییہ میٲنس جنونس ڈۆل ہوا
ووت بییہ تتھۍ دردہ ون کِس دامنس تل ژھال دتھ
یتھ اندر قرنہ بدین ہند نیلہ ناگ
یارِ گنرس منز چھہ کتہِ تامتھ وزان

تریشہ ہتۍ درایہ بیہ سۅکھ یٲغی خیالن ہندۍ ہرن
وٹھ پھیشاں پیہم کھماں نارن وساں سنگرن کھساں
نیلہ ناگک پے کڈاں دوراں دواں
پھیرۍ پھیرتھ پیۍ ژھینتھ سپدیۍ وُداسۍ

تام پۆت کنہ واں گیم پتھ کال کُن ترٲوم نظر
عمرِ ہند کھیۆل بالہ تینتٲلس وچھم لمۍ لمۍ کھسان
بالہ تینتٲلس تتی ییتنتھ چھہ اکثر آفتاب
رٲژ سُمہِ شفقچ سِندر تراواں تہ سپداں بالہ بزۍ

اتھۍ اندر برونہہ کنہِ میہ کھرش ہیو گۆو قدم ٹھکہ رٲوم
کنڈۍ دۅپھس اندر وچھم ٲوج تہ زٲوج ٲلۍ ہن
ٹھولہ جوریاہ نیج نیج
بے صدا پچ پچ کراں آلو دواں وشنس پھہس
اکھ رژھا اُکنے دُکلہِ گٲمژ حسیں ون ژٔر بہت
منزۍ دواں فضہس اندر کس تام بے تابانہ ؤنۍ
پیش کالچ کل بدس کالکۍ ستم
زندگی ہنز تریش نلہ ناگک امار
مارۍ مٔنز دیوانگ
دور کتہِ تامت گجرۍ ڈوکس اندر اکھ ژانگۍ ریہہ
بڈکہِ ماراں منزۍ ژھیواں منزۍ شولان
حٲدثن ہاپتھ پنجن کمۍ کٲسۍ متۍ ازتاں چھہِ نم
سۅیتہِ اتھ ژٲنگس اگر شرۍ پاٹھۍ کانہہ مژراوِ ور
تیلہ پھیرۍ اشۍ قطرہ ہی کٔژتام پیڈن زورِ پیٹھ
ژونگ ژھیوِ راوِ گجر ڈوکک وجود
گل چھنتھ پییہ روزِ بس کنڈۍ دار شاخ
دردہ ون کس آسمانس پییہ نہ کانہہ کریہنیارہ داغ
تارکا کُنہِ اندہ کانہہ ہے پھٹ تہ پھٹ
نیلہ ناگہ چہ تریشہ کانہہ ہے پیۆو تہ پیۆو

نیلہ ناگ
چیانہ اچھ چیانین اچھر والن ہندس سایس تل
اۆبرہ لنگس منز چھہ زوتاں شامہ تارکھ لوبہ ون
نیلہ ناگ
زاو ییتہ اولم صبح ظلمات ڈۆل
شعر گۅڈنیک آدمس سپدیو عطا
عیسی ہس درایہ صلیبچ باجہ کنڈۍ تاجچ برات
نجدہ ون اکہ رمزہ گۆو گلنار
وسۍ پیۆو بے ستون
نیلہ ناگے کایناتکہ دٲیرک مرکز تہ گۆو
نیلہ ناگے زندگی ہندین دۅکھن ابدی سرور
ہاوسن ہند انتہا
نیلہ ناگس تام واتن بٔڈ کتھا

(لوہ تہ پروہ 1965)


پرینۍ شاہراہ

دور اکھ زیٹھ، سرد، پرینۍ شاہراہ
بے صدا، پرسکون، پراسرار
زاگہ سۅندر، حسین، ماگچ راتھ

زیٹھ زن شراونس اندر دگرس
آسماں قد سفید پھرستچ ژھاے
سرد زن شامہ پتۍ بہت تنہا
یاونس پیر مرد کانہہ دیہِ ناد

کاروانن یہ وتھ اژھینۍ تہ بیہ خواب
نندرِ ہۆت پیالہ دتھ چھیہ بۆمبراواں
واد ہاناں چھہِ ماگہ ژھٹھ ڈیشتھ
ناد پھیراں چھہِ پۆت، بیہ پے، بے تاب

وچھ ژپاسےوساں چھہِ کیا شنہ تھۆسۍ
بے صدا، پرسکون، پراسرار
زنتہ وٹھ گومناوۍ دلدارن
اچھہِ پوشن ژۅپارۍ لج ببراے
یم مگر گامہ سۅندرہ از یژکالۍ
جامہ چھتۍ لاگۍ لاگۍ مٲلس درایہ
کارتکۍ زونہِ زن چھیہ لجمژ دونۍ
نور پارن ژۅپارۍ لۆگ چھکراو

قدرتک پرون کم زباں موسی
ید بیضا چھہ یُتھ تہِ وقتک ہیتھ
ید بیضا کمال اظہارک
ورگہ احساں چھہِ سامری کلمار
داغ بییہ ہن پرینس چھہ پرزلاوان
اۆبرہ نیراں چھہ یُتھ چھلتھ افتاب

نظرِ یس کٲنسہِ گیہ سۅ مٔژ ہیہ تن
فرقتک داغ تس گلالن رۆٹ
فرقتک داغ گۆژھ یہ رژھراوُن
ریہہ یہ سینس اندر تہ گٔژھ زیورنۍ
سینہ ہے نارہ دزِ تہ کیا پرواے

چھونپھ دتھ قلزمس نِیِن کُس کیا
نیلہ کنٹھس چھہ زہرہ نۆٹ بۆڈ لاس
زہرہ مس زیچھرس چھہ ژھۆٹراواں
تٍرِ منز سرد بیٚب چھہ وشناواں
تیز تلوارِ پیٹھ چھہِ زن متۍ کھۅر
سونتہ سبزارہ منزۍ قدم تراواں
پان باساں چھہ لۆت لطیف لطیف
فان سپداں چھہ پریتھ کثیف کثیف
تن تنہا، بیہ سنگ، بے قندیل
رہ مسافر چھہِ ادہ ہیواں پراونۍ
دور اکھ زیٹھ، سرد، پرینۍ شاہراہ

شاہراہ یتھ نہ میلہ پٹ نہ سراے
وقت خاموش، بے پگہ، بے از
کانہہ گلابک وتھر نہ کانہہ کنڈۍ پیۆت
نہ ٹینڈین دگ نہ منز اتھس خۅشبوے
کانہہ تہِ ٹٹہ وہر، کُنہِ تہ پکھہِ ہند واش
بند فضہس دوان چھہ نہ أڈ گراے
ظاہرچ تیہہ نہ باطنچ نرمی
آب باقی نہ کانہہ سرابک خواب
بس چھہ اکھ کینہہ نہ، کینہہ نہ، کینہہ نہ، کہنۍ

(لوہ تہ پروہ 1965)


جنگل

زال وہرتھ چھہ دور تاں جنگل
چشمہ لوسم وچھاں وچھاں جنگل
پاد تاں لوسۍ شوق تاں پرانیۍ
دم بدم تازہ دم جواں جنگل
پننہ ازلک تہِ باخبر عٲرف
میانہِ ازلک تہِ رازداں جنگل
نٲیلن ہندۍ صدم قدم بقدم
گٲیلن منز نواں بڑاں جنگل
عظمتک بے مثال اکھ تاریخ
پانہ کلہن تہ داستاں جنگل
کُس چھہ وٲصل تہ کس سپد محرم
کینہہ چھہ پوشیدہ کینہہ عیاں جنگل

پانۍ پانے کڈاں چھہ واوس کل
پانۍ پانے الان ڈلاں جنگل
کریڈہ زالن تہِ لولہ کانچھاں آے
ہرنہ کھاون تہِ پھانپھلاں جنگل
کلۍ دۅپھن ہند تہِ بے پناہ غمخوار
رٲیلن ہند تہِ باسباں جنگل
سونتہ کالس تہِ نالہ متۍ سوزاں
ماگہ ششرس تہِ یژھ براں جنگل
کتجہ آلین تہِ لولہ داراں شاخ
حادثاتن تہِ لے کراں جنگل

ککلہ بولاں چھیہ یارہ سند گفتار
وچھ یہ بے ذوق بے زباں جنگل
یام نیراں چھہ سریہِ ہیتھ زژہ مۅٹھ
تام ژونین چھہ ٹھرۍ تھواں جنگل
یام پوٹھاں چھہ کانہہ مژھیل ارماں
تام لاگاں چھہ امتحاں جنگل
یام میلاں چھہ دۅن دلن سودا
پھاس تراواں چھہ درمیاں جنگل
بال کٲتیا ژٹاں چھہِ متۍ ہاوس
لال کٲتیا چھہ راوراں جنگل

یوت ظالم تہ یوت بے مروت
یوت ٲستھ تہِ خۅش کراں جنگل
شانہ وۅگناں وچھتھ امیک سبزار
پرانہ ویسراں اگر چھناں جنگل

(لوہ تہ پروہ 1965)


 بے وق

زٔر تہ کٔج خاموش راتھ
ٹھس ٹھس ٹھس
کتھ نہ باتھ
ترین برنزین ہند بے صبر اکھ انتظار
"ییژ مستی؟”
تڑ — تڑاخ
"کُس سا چھو —؟”
"سے یمس یۆدوے ژیتس آسی زمانا اکھ سپد
ناد بوزتھ واد ہیو اندرے کریوتھ
یاونچ تیہہ ییلہ ہمی، ییلہ زانۍ ہندس خلوکھس اندر اژکھ
زان بوزکھ، زان ڈیشکھ، زانہ بے زان بنکھ”
کتھ نہ باتھ
ٹھس ٹھس ٹھس
تڑ — تڑاخ
زٔر تہ کٔج خاموش راتھ

(لوہ تہ پروہ 1965)


شام تا صبح

گاشس گیہ ترہ پچہ جامن
یٲغی ژھایو کۆرہس جۆٹ
شامس اکھ اکھ انگ ویگلیوو
برگس برگس عیرق پھۆٹ
صرژن ہندۍ تارکھ پرزلیۍ
معنہِ مسافیرن انہِ گۆٹ

لذژ ہندس بند کمرس
وٲراگن پھٹروو برہ پۆٹ
تھرسہ تھرسہ پرانین دیوارن
صدۍ ین ہند وسۍ پیۆو نلہ وۆٹ
شنیاہن تامت پھٹۍ کنڈۍ
دنیا جنیاتو تل رۆٹ
لیدریمژ ژمٹھیمژ وتھ
قدمن کانچھ تہ منز کھۆٹ

تارو پیٹھہ گیہ ژانگین کٕھر
پننی ژھایتۍ چورکھ ہۆٹ
پھم مالن لٔج گاشچ ہانژھ
افتابس گۆو آنگن ژھۆٹ

رنگس رنگس گیہ ملون
تصویرن ہند نۆو اندرۆٹ

یارہ بلن کھۆت آبک گٕتھ
ییراں ییراں اکھ اکھ نۆٹ

(بییہ سے پان، 1967)


سرسٲے شہر

یہ چھہ بے پژھ اکھ سرسٲے شہر
وتہِ وتھ چھیہ ٹکاں وتہِ وتھ چھیہ برکاں
پریاگہ چہ وتہِ ہے شنکھ وایکھ
اند وٲتتھ ڈیشکھ کابک بُتھ
اسمانہ کہ ہاوسہ وُپھ تراوکھ
اچھ مژراوکھ پاتالس منز

ژہہِ ژہہِ چھہِ نشانن وِہ بدلان
پریتھ چیز چھہ رنگن ہنز سۅنزل
خوابن تہِ چھہِ خوابے آنپہ دوان
وتہ ڈانبس پیٹھ وتہ گتھ: نِشہ بدۍ

پژھہِ دار اگر کانہہ وتھ ژہ لبکھ
صبحہ شام پکاں سۅ تہِ واتی اند
یمہ شہرہ گژھتھ یتھۍ شہرس تاں

(بییہ سے پان، 1967)


نوش لب

پھل ژندر زونہِ وٹھن
کتھ تام کتھہِ پیٹھ پھۆل اسُن
آدنچ معصوم لغزش
یاونک رنگین گناہ
بیقلس شۆدرس گماں گۆو
میانۍ عشقن کار کۆر
پان سۅمبرتھ ژھال آکاشس تجُن
کٲژا تہ کیا
زونہِ وچھ اکھ آبہ ملرا
درایہ پانس پننہِ لوسن شایہ
خلوکھ جایہ کُن
کتھہ گٔرس وقتس چھتیہ بمہ تاں
گیواں منز شہرہ گامن
چایہ دامن
پیٹھ
"عجب ملکس دلس سنۍ نوش لب”

(پدس پود ژھاے، 1972)

یہ نظم چھیہ 1969 منز وننہ آمژ۔


3 تبصرے

S A Malik کو جواب دیں جواب منسوخ کریں

Fill in your details below or click an icon to log in:

WordPress.com Logo

آپ اپنے WordPress.com اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Google photo

آپ اپنے Google اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Twitter picture

آپ اپنے Twitter اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Facebook photo

آپ اپنے Facebook اکاؤنٹ کے ذریعے تبصرہ کر رہے ہیں۔ لاگ آؤٹ /  تبدیل کریں )

Connecting to %s